مدونة شفيق السعيد 2 | مارس 2012


 10 مارس 2012 
 
لأنك صالح
لأنك صالح وفيك الصلاح
مآصل وأصلك شجر طراح
تقابلك عواصف ..
تواصل تجازف…
بربك بتقوى تمر الرياح
لأنك نظيف الإيدين والجباه
لربك بتسجد تخاف من لقاه
لا تظلم …..
لا تيأس ….
مهما الحياة
تطًول ف ليلها…بجيك الصباح
لأنك بتؤمن بقدره ونصيبه
مسًلم وماشى بسنة حبيبه
مٌسلم ومهما المسلم يصيبه
ساكن في قلبه صبر وسماح
خيًر وسعيك ديمًا ف خير
مسامح تصارح مرفرف كطير
امير المودة وودك يصير
ضلك لغيرك وشوقك براح
لك طله و معاها يطل النسيم
وبسمه تعيد الزمان القديم
زمان المحبه وطبعك كريم
تحب الحياة حركة وكفاح
Tags التصنيف: شعر كتب من طرف: shafiek1968
بتاريخ : 10 مارس 2012

(0) التعليقات | (0) التعقيبات | رابط دائم

 09 مارس 2012 


الثورة دى ثورتنا إحنا
والميدان  بيتنا ومطرحنًا
ملامحه من ملامحنا
يفرح لو يشوف فرحتنا
ويحزن لو غبًرت ريحنا
وأما نور الصبح بان
ودعناه وروحنا
****
شُجعان ولا بنخاف
أحرار نكُلها بحاف
إخوات ولا في خلاف
مسلم مسيحي هتاف
أشراف إيدينا نضاف
ومصر اللي فوق لكتاف
عشانها تهون روحنا
****
ليها نموت ونعيش
مصر اللي منها مفيش
لا خوف ولا تهميش
ايه يعنى رصاص بيطيش
جٍمال بغال تهويش
تجينا أو ما تجيش
قًوا العزيمة الجيش
ساند وداوى جروحنا
****
لما الأمانة هانت
على خونة في إيديهم كانت
نٌكته قالوها وباخت
مصر أم التاريخ شاخت
نشفت بحورها وراحت
وأما الروايح فاحت
فجأة الحقايق بانت
مصر الصبية اتعافت
مصر العفية صاحت
خيري وكنوزي لازالت
ترابي وأرضي أنا جنة
****
ولادى هما ريس مالي
ولادى عزوتي وجلالى
ف العمل كنزنا الغالي
بإديكوا تغزلوا شالي
بالرضا ينصلح حالي
تعود لي عزتي ثاني
مع بعض تقولوا موالى
بلادي بلادي بلادي
يا إسم جميل بريحنا
*******

Tags التصنيف: شعر كتب من طرف: shafiek1968
بتاريخ : 09 مارس 2012

(0) التعليقات | (0) التعقيبات | رابط دائم

 09 مارس 2012 

مش عايز مليارات
أو تحفه وانتيكات
ولا حابب فله فخمه
أو ثروة في بنك ضخمة
أو أكل يزيدنا تخمة
يا اخوانا بس ذمة
وقلوب تسكنها رحمه
علينا تكون أمينة
وتراعى المولى فينا
هتعدي الازمة بينا
نبقى أحسن م اللي فات
أنا عايز م الحكومة
تقوًم ألف قومه
ع الرشوة والفساد
والظلم في العباد
وايدين قادرين شداد
نظيفة ومستقيمة
والبركة في الشباب
والجيش اللي استجاب
بانوراما واتحاد
ومصر أم البلاد
فرحانة بالولادة
والخير بعد الغياب

 

Tags التصنيف: مقالات كتب من طرف: shafiek1968
بتاريخ : 09 مارس 2012

(0) التعليقات | (0) التعقيبات | رابط دائم

الغرام فى الدم سارح
والهوى
طارح معزه
والحنين للقرب بارح
والنوي جارح
يا عزه
يا إبتسامه فجر هلت
بددت ليلي الحزين
يا ندى الصبح اللى سأسأ
فوق خدودي الدبلانين
بلّ شوقهم
صحى لون الورد فوقهم
كل خد
وشم ورده
مين يدوقهم
غيرك إنتي
ومين سواكي
يا حياتي
يا ملاكي
يا نسيم الحب لما هب
هز القلب هزه
يا هوى الأحلام يا عزه
الليلادي جـُم خدونى يا ملاكي
جوز تنابله
ونـُص دسته
من التيران
كنت بأحلم يا حبيبتي
كنت بأحلم
بيكي انتي
كنا قال
أنا وإنتي قال
ف جنينه خضرا
ومحاوطها البرتقان
والسيسبان
وإنتي جوا قرنفلايه
بالعبير بتستحمي
أجري يمك يا هوايا
تسبقينى وتجري يمي
أحضنك
وأشرب عبيرك
من شفايفك
والغصون
واقفه وشايفه
بتراعينا
بس خايفه م العيون
والعيون بتقول كلام
والكلام
طاير حمام
بينادينا بالأغاني
ويهادينا بالسلام
كنت بأحلم يا حبيببتي
كنت بأحلم
بيكي إنتي
أيوه انتي
ومين سواكي
يا حياتي
يا ملاكي
يا نسيم الحب لما هب
هز القلب هزه
يا هوى الأحلام يا عزه
وأنطلق فى الجو فجأه
يا حبيبتي
صوت مفاجأه
صوت يخلي الدم يجمد
إصحى يا أحمد
إصحى يا أحمد
وانتهى الحلم الجميل
وابتدا الهم التقيل
فين إمام 

إنتوا مين 
إحنا ناس مكلفين
تيجي سالك مش ح تتعب
وإحنا طبعاً معذورين
إنتوا دود الأرض
والآفه المخيفه
إنتوا ذره رمل
فى عيون الخليفه
إنتوا كرباج المظالم
والماسي
إنتوا عله ف جسم بلدي
إنتوا جيفه 
سكتوه ابن الكلاب
سففوه من التراب
فتشوا كل الأماكن
طلعوا رفوف الدولاب
كمموني يا حبيبتي
كتفوني يا حبيبتي
قومونى .. قعدوني
كل شعرة فى جسمي
بالعين فتشوها
المخده من جنانهم
شرحوها
وإنتهى التفتيش
ما فيش
صدقيني
ما تخافيش
هو فيه يا عزه عندي ممنوعات
غير بأحب الناس
وبأكره السكات؟
بص واحد م التنابله
جوا عيني
وإنتي عارفه
عنيه صافيه وطيبين
زي كل عيون بلدنا يا حبيبتي
شباكين
ع القلب دوغري موصلين
كان مُـناه يلمح علامة خوف بسيطة
طب حييجي الخوف منين ابن العبيطة
هو مين فينا الجبان
ولا مين فينا اللي خان
اللى قلبه بالمحبة وبالأماني
وبالربيع الأخضر مزهر
والأغاني
ولا كلب الصيد
وأسياده الأباطرة
أكالين لحم البشر
فوق الصواني؟
هو مين فينا الجبان
ولا مين فينا إللى خان
هو بص فى عيني بصة
إرتجف وف حلقه غصة
واتعوج ومال وقال
جملتين مش مفهومين
أصله شاف صورتين جـُمال
فى العيون الطيبين
مصر فى العين الشمال
وإنتي فى العين اليمين

أحمد فؤاد نجم

أضف الى مفضلتك
Tags التصنيف: شعر كتب من طرف: shafiek1968
بتاريخ : 09 مارس 2012

(0) التعليقات | (0) التعقيبات | رابط دائم




\/ More Options ...
shafiek1968
تغيير القالب...
  • [مسجل الدخول]]
  •  
  • صاحب المدونة» shafiek1968
  • مجموع التدوينات » 463
  • مجموع التعليقات » 3
تغيير القالب
  • Void « الإفتراضي
  • Lifeالطبيعة
  • Earthالأرض
  • Windالريح
  • Waterالماء
  • Fireالنار
  • Lightخفيف

الرئيسية

    الذهاب إلى رئيسية الموقع

الأرشيف

    الذهاب إلى أرشيف تدوينات الموقع مصنفة حسب الشهور

الألبومات

    ألبومات صور و ملفات الموقع حيث يمكنك معاينتها و تحميلها
.

الروابط

    الذهاب إلى تصنيفات الروابط

الإدارة

    كل ما يتعلق بإدارة المدونة